Kung Kailan Nagkakabisa ang Kapangyarihan ng Wikang Ingles ayon kay Bobbie Salazar

Ilan lamang ang sumusunod sa mga sitwasyon na nagpapatunay na sadyang mabisa ang pananalita sa wikang Ingles, lalo pa at ito ay ginagamit upang iparamdam ang posisyon sa lipunan. Nadiskubre ko ang ganitong katangian sa tauhan ni Bobbie Salazar (na ginampanan ni Bea Alonzo sa pelikulang Four Sisters and a Wedding), na limang taon ding tumira sa New York upang magtrabaho at kumuha ng Masters Degree sa Columbia bago bumalik sa Pilipinas. Ito ang nasiyasat ko.

1. Paglalahad ng opinyon

Ginagamit ang wikang Ingles sa pagpapahahayag ng opinyon sapagkat, sa rasong hindi maintindihan, mayroon itong mga salig na nagpapahiwatig ng kapormalan at katalinuhan. Bakit pa ba sinang-ayunan nina Alex, Teddie, at Gabby ang kapatid na si Bobbie sa bawat "That's a lame idea" na ipinatong niya sa kanilang mga pakanang tigilin ang kasal nina CJ at Princess? Bukod pa doon, bakit pa nila kinuha ang kaisa-isang suhestiyon ni Bobbie bilang batayan ng kanilang mga balak bagaman hindi naman nila naintindihan ang kanyang panuto?

2. Pakikiusap

Sinasalubong ng pag-aasikaso ang dalubhasa sa wikang Ingles, basahan pa man ang kanyang suot. Kaya naman, Ingles ang ginagamit kapag mayroong utos o pakiusap. Ano mang usapan ang ilahad ng mga kapatid niya ay hindi makaabala kay Bobbie. Isang "Go ahead", o "Let's stop this", o hindi kaya'y "You know what I mean" niya lamang ang makapagtatahimik o makapagaaligaga sa kanilang lahat.

3. Panunumbat

Ginagamit din ang wikang Ingles kapag punung-puno na ang nagsasalita sa puntong gusto na niyang ipagdikdikan sa kausap kung gaano ito ka-bobo. Basta dalubhasa ang nagbitiw ng salita, tiyak na hindi pa tapos ang pangungusap ay manliliit na ang kausap. Isinisiwalat nito ang karaniwang kaisipan nating mga Pilipino na higit na mataas ang wikang Ingles kaysa wikang Filipino. Mayroon pa bang higit na nakapipikon sa "My God! I can't believe you pushed through with that stupid idea!" ni Bobbie?

4. Pagmamalaki

Higit sa lahat, ginagamit ang wikang Ingles kapag mayroong maipagmamalaki. Nagsasaad siguro ito ng kredibilidad. Kung bakit Ingles ang pakli ni Bobbie nang ipagpalagay na caregiver ang kanyang trabaho sa New York ay maipaliliwanag ng kaisipang ang wikang Ingles ay nagpapahiwatig ng mataas na pinag-aralan at magandang katayuan sa buhay. Dahil dito, agad na nakatatanggap ang dalubhasa sa wikang Ingles ng paghanga mula sa karaniwang Pilipino, na siya namang naglalagay dito sa pedestal upang tingalain.

Lubos nga sigurong makapangyarihan ang wikang Ingles, kung kaya naman posisyon din ang nais nating ipadama sa tuwing gagamitin natin ito. Nakakatakot isipin na nagiging awtomatiko ang paggamit natin ng wikang Ingles sa tuwing tayo ay nahaharap sa mga sitwasyong nabanggit. Sa pagsamba natin sa wikang banyaga, hindi natin namamalayang inilalaan na natin ito sa mga pagkakataong nais nating higitan ang kapwa. Lahat ay gustong matugunan ng opinyon, maasikaso, magtunog matalino, at magmalaki. At sino pa ba sa lipunan natin ang aabutan ng pagpapahalagang gaya nito kung hindi ang Inglesero?

Nakakikilabot isipin na hindi na natin kailangan pang maglabas ng ginto, o ipagsigawan sa mundo kung magkano ang kinikita natin buwan-buwan, o kung saang prestihiyosong paaralan tayo nakapagtapos. Sapat na ang pagbigkas sa Ingles upang mapatunayan ang lahat ng ito.